(tilbakeblikk) Prins Oscar (1829-1907), som seinare vart kong Oscar II, var i Eidfjord denne sumardagen for nøyaktig 140 år sidan. Også statsminister Fredrik Stang var med på turen, som kunne ha vorte hans siste. For det heldt nemleg på å gå heilt gale i Måbødalen då dei skulle inn til Vøringfossen.
Turistforeininga var på denne tida heilt nystarta. Ein hadde opplevt at fleire og fleire turistar kom til Eidfjord for å sjå fossen. Og dermed kom trongen for ein brukande sti inn til fossen. Dermed vart det arbeidd med å få stien, Turistvegen, ferdig til dei vidgjetne framandkarane skulle koma. Og arbeidet med Turistvegen vart ferdig i tide, og prinsen og statsministeren kunne rida inn med fylgjet sitt. Så skjedde uhellet. Hesten til Fredrik Stang glei på ein stein, og hest og mann fall ned ein skrent. Til alt hell gjekk det ganske bra, for statsminister Stangs fall stoppa i ein stor stein. Dermed fekk prinsen og statsministeren sjå fossefallet nedanfrå. Det vart nok eit minne for dei, men eg vil tru turen òg lenge vart hugsa på grunn av det dramatiske fallet.
Les meir om den dramatiske ferda i “Eidfjord – Historiske Glimt I” (s. 159) (2006)
Teikning: Jon Hjelmevoll, Ulvik. Prisen og hans følgje rid inn Turistvegen.