Stor Jakob Sande-førestelling i Eidfjord
(ka skjer?) Laurdag 19. oktober vert ein spesiell dag for mange eidfjordingar. Då vert det nemleg framført ei særs spanande Jakob Sande-førestelling. Sande har eit stort namn blant mange bygdefolk, for diktaren har vore ein del av vestlandskulturen for mange vaksne gjennom mange år. Dikta hans er vidgjetne for så mangt; dei kan vera muntre, underfundige og alvorsame.
Jakob Sande vart fødd den 1. desember 1906 på Klokkargarden i Dale i Sunnfjord og døydde den 16. mars i 1967 på Ullevål sjukehus. Foreldra var Andreas Sande og Ragna Margrethe f. Barsnes. Han gifte seg i 1942 med Solveig Ytterlid, og dei fekk dottera Siri i 1943. Sande var lærer, men fyrst i 1963 tok han avgjerda om å slutta i lærargjerninga og i staden satsa heilt på diktinga. Han fekk då eit arbeidsstipend på 15 000 kr. I ettertid kan me sjå at dette var for seint. Han var alt mykje plaga av sjukdom, og berre fire år seinare døydde han.
Det er musikaren Kjetil Kversøy og hans to musikarar som kjem til Eidfjord for å gje oss førestellinga «Frå Sunnfjord til Rio» denne haustlege laurdagskvelden. Kversøy har sett ny musikk til Sandes dikt som tek utgangspunkt i det året diktaren var til sjøs med «Villanger» i 1932. Førestellinga har tidlegare vore vist på Det Norske Teateret i Oslo. Ein gjer merksam på at førestellinga ikkje er ein kavalkade over dei mest kjende dikta til Sande.
Diverre er det avgrensa plass på Eidfjord Fjell & Fjord Hotel, men me vonar at dei aller mest interesserte Sande-tilhengjarane raskt skaffar seg billettar, for her må ein rekna med pågang også frå folk frå fjorden. Det vert førehandssal av dei kring 80 billettane på hotellet frå ca. 1. september.
Det er Kulturkomiteen (tidlegare Eldrekulturkomiteen) som er arrangør i samarbeid med Eidfjord Fjell & Fjord Hotel og Kulturkontoret, Eidfjord kommune.
Nærmare informasjon om førestellinga og billettsalet kan ein få fylgjande stader:
EidfjordBloggen,: http://www.eidfjordbloggen.isay.no
Facebook: Kulturkomiteen
Twitter: @Kulturkomiteen
Instagram: Kulturkomiteen
Eidfjord Fjell & Fjord Hotel: www.effh.no