(ka skjer?) Kulturkomitéen har 18. mars 2014 sendt dette brevet til kommunens politikarar. Ein vender seg til partigruppene for å høyra korleis desse ser på bruken av gallerirommet på Galleri N. Bergslien.
Til partigruppene/politikarane i Eidfjord
Vedkomande bruken av gallerirommet på Galleri N. Bergslien
Galleri N. Bergslien vart opna hausten 2001. Det mindre gallerirommet har vore brukt til skiftande utstillingar, til konsertar og møte. Utstillingane har til no i stor grad vore med profesjonelle kunstnarar.
Kultursjefen skriv i eit brev av 28. februar 2014 til Kulturkomitéen at det ikkje er vanleg at galleri skal ha retningsliner for bruken. Vidare heiter det i brevet at det i Eidfjord har vore vanleg med utstillingar med profesjonelle kunstnarar, og at “dei fleste galleri legg seg på ein profesjonell linje, der kunstnarane må ha høgskuleutdanning og/eller renommé som kunstnar gjennom opptak av nasjonale organisasjonar”. I praksis fører jo dette til at lokale kunstnarar faktisk ikkje får synt fram verka sine i det kommunale gallerirommet i bygda.
Basert på dette har Kulturkomitéen 28. februar fått avslag på søknaden sin om å nytta rommet i fire dagar utanom høgsesongen til ei utstilling med dei to dyktige, lokale kunstnarane, Elsa Garatun og Ragnhild Kleivkås.
Kulturkomitéen meiner dette er eit urimeleg avslag og tykkjer difor det er god grunn til at ein diskuterer retningslinene for bruk av gallerirommet. Komitéen tykkjer det burde vera rom for å vera noko smidig, slik at både høgskuleutdanna utanbygds-/utanlandskunstnarar og våre eigne lokale, dyktige kunstnarar kunne få sleppa til i eit kommunalt rom. Om ikkje anna kunne ein kanskje opna for dyktige, lokale kunstnarar i lågsesongen.
Kulturkomitéen vil oppmoda partigruppa til no i mars å diskutera kva ein meiner bygdefolket, som ein representerer, er mest tent med, korleis bruken av rommet bør vera i framtida, om rommet berre skal vera for finkultur og om det ikkje er bra og nausynt med nokre retningsliner.
Komitéen ber gjennom dette brevet ikkje om ei konkret handsaming av vår spesifikke søknad, men meiner det kunne vera nyttig for kommunen med ein generell diskusjon rundt temaet – på vegne av alle lokale kunstnarar innanfor fleire kunstarter.
Kulturkomitéen er eit privat tiltak, som sidan 2007 har arbeidd med å skapa kulturell og sosial aktivitet i bygda.
Kulturkomitéens søknad og avslaget frå kommunen finn ein på Innsyn på kommunenettsida 20.1.14.
Eidfjord, 18. mars 2014
Venleg helsing
Kulturkomitéen i Eidfjord
v/ Lars Hoel