Kul tur gjennom fortid og notid i Eidfjord

(ka skjer?)  Eit nytt år er gått, og her kan du lesa komitéens årsrapport og sjå kva som har gått føre seg i 2012.

Årsrapport for Eldrekulturkomiteen (EEKK) 2012

Eldrekulturkomitéen arbeider for å skapa kulturell underhaldning for dei eldste i bygda, spesielt på Bygdaheimen.

I 2012 har EEKK arrangert kring 17 arrangement på Bygdaheimen fram til jol, og i tillegg vert det 8 romjulsarrangement. I tillegg kjem feiringa av Eldredagen sundag 7. oktober.

• 31.1.          Filmframsyning, Ulvik-historie
• 9.2.            Filmframsyning,Ulvik-/Eidfjord-historie
• 16.2.          Filmframsyning, Ulvik-/Eidfjord-historie
• 1.3.            Biletframsyning, Eidfjord gjennom fire årstider
• 12.3.          Seniordansen
• 14.3.          Film: Fjolls til fjells
• 26.3.          Ole Bull-tema, musikk
• 5.5.            Filmframsyning om jakt m.m. i 1959
• 17.5.          Filmframsyning, NRK-film frå 1967 om Kjeåsen
• 10.6.          Filmframsyning om Solgården
• 13.7.          Filmframsyning, Sputnik i Thailand
• 19.8.          Fransk gutekor
• 8.9.            Gruppe frå Hardangerkoret
• 13.9.          Nederlandsk kor, Grootkoor
• 7.10.          Eldredagen på Samfunnshuset
• 13.10.        Vinjes Ferdaminne
• ?                 Kulturskulen v/ Lynna m/elevar
• ?                 Vetlaskredo/Harmoni

Ole Bull- og Vinjes Ferdaminne-arrangementet har vore arrangert i samarbeid med Kulturkontoret.

Eldredagen har dei siste åra vore feira på Bygdaheimen. I år ville ein freista å laga til eit annleis arrangement på Samfunnhuset. Dette vart grundig planlagt, og ein fekk til eit fint program med hakkasteik-middag og eit stort underhaldningsprogram, der ordførar Anved Johan Tveit, Detelina Deneva, Johannes Sekse, Lilliann Høyvang Andreassen, Ågot Bjotveit og Einar Liseth tok del. Dei skal alle ha stor takk. Det skal også Kulturskulen m/Bjørne Møen i spissen for all hans uunverlege hjelp. Kring 60 personar fekk ein veldig fin dag i Samfunnshuset.

EEKK spør ulike eidfjordingar og andre, som gjestar Eidfjord, om å underhalda på Bygdaheimen. Nokre opptrer i “vår” regi, medan andre vel å ha/ta direkte kontakt med Bygdaheimen når det gjeld å opptre. Dette er heilt problemfritt. Det viktige for både EEKK og andre er å bidra til å skapa aktivitet og underhaldning for våre eldste; ikkje kven som arrangerer. Også Bygdaheimen sjølv har eigne arrangement, mellom anna jolabordet.

Me takkar difor alle som har teke seg tid og underhalde på Bygdaheimen anten det er i vår eller andre sin regi.

Eldrekulturkomitéen spør alltid alle aktørar om å opptre gratis, og me har ikkje hatt utgifter i 2012. Eldrekulturkomitéen har ingen sjølvstendig økonomi og ikkje noko rekneskap. I eit samarbeid med Bygdaheimen/kommunen har likevel komitéen tilgang til “Fotobokkontoen”, der det finst pengar som kan nyttast når det trengst. Pengane på kontoen kjem frå sal av Lars Hoels fotobok “Eidfjord i svart og hvitt”, som Lions selde for nokre år sidan, frå overskot på Jon Eikemo-arrangementet i 2011 og frå eit lite overskot frå Eldredagen 2012.

Eldrekulturkomitéen vart starta i 2007 av Lars Hoel i samband med hans fotobok/inntektene av denne osv. All inntekt av denne boka i perioden 2007/2009 gjekk uavkorta til eldrekulturtiltak; fyrst i regi av Lions Eidfjord fram til 2009, deretter i regi av Eldrekulturkomitéen. Fleire eidfjordingar har teke del i EEKK gjennom åra, medan Gunnvor Hopen Veka og Lars Hoel har vore med heilt frå starten og fram til i dag.

Kven kunne tenkja seg å bidra med litt underhaldning i jula?

(ka skjer?)  Eldrekulturkomitéen vil for fjerde år på rad arrangera romjulsunderhaldning på Bygdaheimen. Me startar opp 1. juldag og avsluttar 1. nyttårsdag. Me ynskjer kontakt med nokon som vil ofra ein halvtime éin av melsdagane. Underhaldninga lyt starta klokka 16.00. Du kan sjølv velja ein dag det passar deg. Song, musikk, teater, opplesing, biletkåseri og mykje anna ville høva godt. Noko som alle kan gjera – om ein har lyst -, er å visa bilete frå ein fjelltur, ein ferietur eller om eit tema ein har interesse av. Ta kontakt med Eldrekulturkomitéeen v/ Gunnvor Hopen Veka eller Lars Hoel om du har tips til oss. Takk for at du vil hjelpa. Det vert diverre ikkje gitt betaling for underhaldninga.

(ka skjer?)  Revygjengen i Teaterlaget førebur seg på AUSTAVINDen i haust, dvs. laurdag 3. november.  Har du tenkt å ta turen på premieren? Då er det lurt å vera rask med å kjøpa seg billett på Destinasjon Eidfjord.  Her er det ope fra 08.30 til 15.30 frå mandag til fredag. Austavind er en skikkeleg lokalrevy, der ein får svært mykje att for pengane (150 kroner kostar billetten). For gjennom nærmare tre timar, inkludert pause, får me oppleva heile 20 innslag; sketsjar og anna. For fyrste gong kan du her sjå nokre av titlane på innslaga. Spananande vert det. 

• Eg minnest Eidfjord i gamal tid (song)
• Kommunen I «I resepsjonen»
• Kommunen 2 » Ordførarens møte»
• Kommunen 3 «Kva dato er ledig?»
• Dei lyt no få ergra seg (song)
• Tulle og tøyse.-nytt
• Kulturelt næringsengasjement
• Kurskveld i folkedans på Seniordansen
• Ut og ta eit smørbrød i Eidfjord
• Skal det vera ein filmrolle?
• Har dei spurd deg?

Har du tenkt deg på revyen? Då er det flott om du kjøper billettane i morgon eller så snart som mogeleg. Det vil vera ein stor hjelp for arrangøren, Eidfjord Teaterlag.

(ka skjer?)  Strålande Eldredag-feiring i Eidfjord Av ulike årsaker vart Eldredagen feira fyrst sundag 7. oktober i Eidfjord i år. Og dagen kom seint, men godt, for det vart eit flott arrangement i Samfunnshuset på Lægreid. I opningstalen sin fortalde ordførar Anved Johan Tveit at ein kom i gang med Eldredagen internasjonalt i 1992. Han takka også arrangøren Eidfjord Eldrekulturkomité for deira arbeid med arrangementet. Gjestene kosa seg fyrst med hakkasteik. Ein dugnadsgjeng og Eidfjord Fjell & Fjord Hotel stod for serveringa, og ein vil tru at maten vart riktig godt motteken. Kaffi og kaker høyrde sjølvsagt med, og stemninga var god utover ettermiddagen. Høgdepunktet var nok underhaldningsdelen, der publikum fekk oppleva eit svært variert program. Den ikkje ukjende journalisten Johannes Sekse var dagens konfransier og heldt også eit fornøyeleg kåseri. Einar Liseth heldt tale for dagen, og kom mellom anna inn på det slitet dei eldre, og ikkje minst kvinnene, tidlegare hadde på gardane i Hardanger. Han heidra den eldre garde og gjorde også eit poeng av at ein ikkje er komen gratis til noko, men at det har vore ein kamp for å nå måla sine og skapa eit godt velferdssamfunn. Vidare las Lilliann Høyvang Andreassen vakre dikt som rørde mange, og 17 år unge Ågot Bjotveit gjorde stor lukke med toradaren sin. Ho vart spesielt takka for vera slik ei positiv jente, som fleire gonger har spelt for dei eldre i bygda og spreidd mykje glede. Ein fekk sjå eit flott ljosbileteprogram, «Eidfjord gjennom 4 årstider», som Frede Olaussen hadde sett saman, og kvelden vart avrunda med Detelina Denevas fantastiske pianospel. Når me også nemner at det sjølvsagt var utlodding og at fine vinstar vart tekne med heim, så kan ein rekna med at det vart ein svært triveleg dag i Eidfjord.

(ka skjer?)  Heile 102 år vert Knut tysdag 28. august. Dermed er han sjølvsagt Eidfjords eldste innbyggjar. Oftast er det jo damene som stikk av med desse rekordane, men på våre kantar er det ein humoristisk og triveleg mann som stadig har glimt i auga; Knut Lægreid. “Still going strong”, svarar Knut når eg spør korleis det går. For engelsken hugsar han enno, og under praten med guten som vart fødd på Lægreid, spratt det ut fleire engelske ord og setningar. Ja, minnet er godt, og mannen er krystallklar. Trur eg vil vera som han når eg vert 102, tenkjer eg.

Eg har ikkje kjent Knut så lenge, men kvar gong han ser meg, slår han fast: “Jaso, er da hereids-maur? Korleis går det på Hereid?” Så får me tru at han meiner at folk frå Hereid var og er spesielt arbeidsame – som maur, men kven veit … Nokre år var Knut sjømann, og han pratar meir enn gjerne om tida til sjøs. Det var faren som hadde fått han med, for han var tømmermann på eit skip i Det Bergenske Dampskibsselskap. 17-18 år gamal mønstra Knut på båten, så gamle karen var han ikkje då han drog frå Eidfjord.  På dette viset fekk Knut sjå ein del av verda, og det var nok ei oppleving på denne tida. Ikkje minst var det interessant å koma heim til Eidfjord og fortelja frå sjømannslivet og framande land.

Skipet som Knut jobba på, frakta korn mellom Canada og Europa. Då det nærma seg krigen, vart det problem med tyskarane. Det kom til dramatiske episodar, og Knut Lægreid hugsar spesielt godt då dei kom inn i den engelske kanal og tyskarane skaut etter båten. Dei hadde kvitt flagg heist i masta, men det hjelpte visst ikkje så mykje. Som sjømann fekk han vitja mange byar i framande land, og Cardiff og Montreal hugsar han spesielt godt, ikkje minst den norske sjømannskyrkja i Montreal. Ein gong gjekk turen heilt opp til Alaska der han fekk møta eskimoar.

Men etter kvart gjekk han i land i Vik, bygde seg hus og fekk seg familie. Knut var eitt av dei sju borna til Torbjørn  og Ingebjørg på bruk 11 på Lægreid. I 1955 gifta han seg med Synnøva Skaare (1920-?) frå Kvammen, og dei fekk borna Thorbjørn og  Ingunn Margrete.

Tysdag fyller altså Knut 102 år. Han har sanneleg mykje spanande å sjå tilbake på, og me gratulerer han på det hjartelegaste.

Foto: LH

(ka skjer?)  Historielaget er ein trufast slitar innan kulturlivet i Eidfjord. Laget vart stifta etter initiativ av Lars Hoel hausten 2000 og har altså halde det gåande på solid vis i nærare tolv år. Flaggskipet til historielaget er Bergasylja-heftet, som vert utgjeve kvart år i november. Leiar i dag er Ragnhild Myklatun, og med seg har ho ein trufast gjeng medarbeidarar. Med fare for å gløyma nokon, tek me ikkje sjansen på å nemna namn. Men sanneleg er det mange som fortener ein stor takk for årelangt arbeid med Bergasylja og anna i laget.

Eineståande koroppleving  på Bygdaheimen då 92-års bursdagsbarnet, Herborg, fekk 40 franske gutar på vtjing

(ka skjer?)  Laurdag 18. august heldt eit fransk gutekor konsert i Eidfjord kyrkje. Men sanneleg tok dei seg ikkje tid til også å vitja Bygdaheimen rett før konserten i kyrkja. Og dermed fekk bebuarane ein feiande flott minikonsert med gutane frå Frankrike. Kan henda var det ikkje så lett å forstå dei engelske og franske tekstane, men det vart ei strålande og mektig musikalsk oppleving denne laurdags ettermiddagen. Og noko heilt ekstra var det for bursdagsbarnet, Herborg, som fekk vitjinga av de 40 franske gutane nettopp på sin store dag, 92-årsdagen.

(ka skjer?)  Teaterlaget, under leiing av Line Dyrstad, arbeider no med to store undehaldningsprosjekt. Fyrst ute er revyen, som kan henda får premiere i november. Ei revygruppe der Mary Herland, Svein Hop og Lars Hoel er med, har jobba i heile sumar med tekstar, og sundag 5. august samla dei fleire lagsmedlemer til eit hytteseminar i fjellheimen. Her var det innleiande leseprøver og mykje moro. Så då er det er vel berre å gle seg til haustens førestelling i Samfunnshuset. Då er tida inne til å melda seg, for no er det ikkje mange dagane før revyøvingane tek til. Tysdag 21. august klokka 19.00 går nemleg teatergjengen i gang med å øva på tekstane som i november skal verta til revy. Einkvar amatør er hjarteleg velkomen med, fortel leiaren, Line Dyrstad. Ein treng ikkje ha erfaring. Det viktigaste er at ein har lyst, seier ho.

Foto: LH, Revyplanlegging i fjellheimen

Herreklubben på tur til Sivlegarden på Stalheim

(ka skjer?)  Tysdag 19. juni dreg seniorane av garde på sumaravslutningstur til garden ved Stalheim som no vert kalla Sivlegarden. Denne turen er open for alle karar som er rundt dei 70 – eller meir – eller mindre. Har du lyst på ein tur, der du får nærkontakt med Per Sivles dramatiske liv og hans vakre, strålande tekstar, ja, då kan du nok snika deg med på turen uansett alder. Avreise vert 09.30, og ein reknar med å vera tilbake i Eidfjord kring 16.30. På Sivlegarden vert det kulturoppleving og lunch hjå vertinna, Randi Engelsen Eide. Interesserte lyt melda seg på hjå sekretæren , Lars Hoel. T. 410 82 845.

Trim, hygge og mykje å læra på Seniordansen

(ka skjer?)  Har du høyrt om Seniordansen?  Dette er altså ei gruppe eidfjordingar av det særs trivelege slaget som treffast kvar måndag klokka 16 til 18 på Samfunnhuset for å dansa og hyggja seg. Akkurat no har laget teke sumarferie, men 10. september startar dei opp att, og då er nettopp du velkomen med. Kan du ikkje dansa, seier du? Ingen fare. Dansane  er ikkje vanskelege, men desto meir moro å halda på med. For dette  er ikkje klassisk dans, men meir ulike ringdansar som gjeng føre seg i eit roleg tempo. Men det er uansett god trim for deltakarane som er frå 50 til 90 år. Så vil du halda deg ung og i vigør, så kan me trygt anbefala å bli med i dansegjengen, som verte leia av Mary Herland og Leif Hereid.

Sjølvsagt er det både lærrikt og triveleg å vera med måndagene på Samfunnhuset, men dansegleda kjem også andre til glede. Det fekk ein sjå 12. mars då dei glade dansrane opptrådte på Bygdaheimen for eit takknemmelig og begeistra publikum. Også i desember 2010 var for øvrig Seniordansen på Bygdaheimen.

Det heile starta i september 2010 då Mary Herland og Leif Hereid reiste på instruktørkurs til Odda, der dei fekk verdifulle impulsar og lærde dei ulike dansane. Så kom dei heim til Eidfjord med mykje kunnskap og motivasjon i kofferten, og 23. september 2010 kunne dei invitera til den første samlinga på Samfunnshuset. Og respons fekk dei med det sama, for heile tolv danseinteresserte møtte opp.

Men korleis artar så ein dansedag seg? Jo, alle stiller opp i ein ring med raude og blåe band. Dette er fordi ein er flest damer, og difor lyt nokre damer ha roller som menn. For å markera dette har “mennene” blå band og damene raude. Så vert det instruksjon og ein prøver seg fram. Undervegs vert det mykje moro og latter, og sjølvsagt tek me ofte drikkepauser (ja, vatn altså). Stundom kosar ein seg òg med kaffe og nokå attåt.

Nokre av deltakarane var dessutan hausten 2011 på dansekurs på Storefjell Hotel. Det var danselaget i Kvam som hadde invitert, og på dette stemnet fekk eidfjordingane treffe heile 110 andre danseglade . Her vart det fine dagar med danseøkter, god mat og fine turar.

Det lyt også nemnast at Seniordansen har hatt besøk av gjestedansare frå Granvin, og det var både inspirerande og hyggjeleg.

Nyleg var Leif Hereid og to andre medlemmer til Odda for å lære nokre nye danser, som laget begynte å trene inn då dei møttes til avslutningsdansen no i vår.  Dansane vart nok ikkje helt ferdig innlærte, men resulterte hvert fall i mykje moro. Samstundes fekk seniordansarane utdelt medlemsbladet “Gladringen” og alle vart inviterte til det komande dansekurset  på Storefjell til hausten.

Laget har i dag fjorten medlemmer, men det er plass til fleire uansett kva alder ein har. Spesielt triveleg hadde det vore om nokre menn ville ta seg ein tur opp på Lægreid ein måndag,  slik at ein kan byte ut nokre av dei blåe banda med ekte karar når ein startar opp att i september.

På biletet  frå oppvisninga på Bygdaheimen i mars er fylgjande med: Kjellfrid Myklatun, Sigrid Kvale, Marit Herland, Aslaug Riber, Johanna Maria Nesheim, Karen Lægreid, Leif Hereid, Brita Hereid, Oddrun Sæbø, Brita Tveit og Mary Herland. Tre medlemmer var ikkje til stades: Ragnhild Herstad, Willy Pettersen og Anna Marie Graff.

Foto:  Lars Hoel

Frå opptreden på Bygdaheimen 12. mars 2012

(ka skjer?)  Etter mange år utan aktivitet vart laget drege i gang att i 2008, i forkant av spelet, av Kari Vambheim og Lars Hoel. Rika-Ragna-prosjektet var då under oppsegling, og det galdt då å leggja grunnlaget for at ein hadde skodespelarar. Då kom teaterringreven Aud Jorunn Skjerven tilbake i manesjen. Ho hadde mellom anna vore med på revystorsuksessen på 80-talet. Seinare gjorde òg Elisabet Joleik og andre sin entré, og laget har vist seg svært levedyktig. Etter spelet i 2009 har ein kunna presentera heile tre oppsetjingar, alle av det humoristiske slaget. Det starta med revyen “Le med oss” hausten 2009, og deretter kom to farsar; ein i 2010 og ein i 2011.

I desse dagar sonderer laget terrenget for å sjå om det vil vera mogeleg med eit samarbeid med Toneskredo om ein Prøysen-cabaret, som kan få premiere våren 2013. Men førebels er ingenting avgjort. Det som derimot er klårt, er at ein på årsmøtet avgjorde at ein skal skipa til ei form for revy til hausten. Ein sette då ned ei superhurtigarbeidande revygruppe med tre personar som skal freista å få Eidfjord til å le, Mary Herland, Svein Hop og Lars Hoel. Revygjengen, som skal arbeida i heile sumar, er allereie godt i gang med idear og tekstar. Så no er det høve for deg som har lyst, til å vera med på revy. Frå dei aller inste og hemmelege sirklar i revygruppa kjem det no rykte om at mellom anna “Tulle- og tøysenytt” kan henda vender tilbake, og at ein prøver å skriva eigne, lokale sketsjar. Så her skal nok ingen føla seg for trygg …

Teaterlaget er ein uhøgtideleg samlingsplass, og det seiest, frå særs påliteleg hald, at det meir enn noko er humør og mykje moro som pregar øvingar og møte. Lyst til å vera med? Ta kontakt med ein av medlemene.

På årsmøtet på Vik pensjonat no i mai gjekk leiaren, Elisabet Joleik, av, og Line Dyrstad tok over. Lat oss nytta høvet til å takka Elisabet for leiarvervet gjennom fleire år. Ho kan definitivt sola seg i glansen av tre svært suksessfulle førestellingar. I styret sit no av Line Dyrstad, Aud Jorunn Skjerven, Johanna Håbrekke, Elisabet Joleik og Svein Hop.

Du kan lesa meir om revyplanane på facebooksida til Eldrekulturkomitéen. (Eidfjord Eldrekulturkomité)

http://www.facebook.com/#!/pages/Eidfjord-Eldrekulturkomit%C3%A9/294242463929300

(ka skjer?)  Herreklubben vart etablert i januar 2012 og er ein treffstad for seniorkarar. Nyleg samla herrane seg for fjerde gong i stova i omsorgsbustadene. Heile ni karar kom då saman. Kaffi og kaffimat høyrer sjølvsagt til, medan ein som avslutning plar ha eit kulturinnslag. Til no har underhaldninga mest dreia seg om lokalhistoriske filmopptak, men denne varme aprilføremiddagen vart det heilt andre tonar. Cuba – det vesle landet i det karibiske hav – var dagens tema, og ein snakka kring den politiske situasjonen før det vart vist bilete på storskjerm. Ein fekk sjå både historiske fotografi frå revolusjonsdagane i 1959 og dagsaktuelle bilete frå Havanna og Trinidad.

Også ein Havanna-sigar kunne ein sjå på bordet, men etter det ein såg, var det ingen som fann grunn til å røyka han. Han enda difor sine dagar i boskorga i stova.

Herreklubben treffest ein gong kvar månad – ein tysdag -, og er for svært godt vaksne seniorkarar som tykkjer det er kjekt å koma saman. Kjenner du nokon som treng koma seg litt ut or heimen, så er han hjarteleg velkomen på ein av samlingane. Neste samling er tysdag 29. mai. Sundag 3. juni arrangerer Herreklubben show med legendariske “Nå skal vi skilles Johanne”-Sputnik. Vårsesongen vert avslutta 18. juni med tur til Sivlegarden ved Stalheim, plassen som no har vorte eit senter for diktaren Per Sivle.

Foto: Ukjend fotograf. Frå revolusjonsdagane i 1959. Fidel Castro på veg inn i Havanna

(ka skjer?)  Takk for at du les EidfjordBloggen. Eg gjer merksam på at det per 17. mai er kome på plass “delefunksjon” for kvart innlegg. Det betyr at du kan dela eit innlegg med dei næraste 853 eller kjæraste 46563 venene dine på Facebook eller på andre sosiale media. Sjølvsagt er det stas om du finn noko her som du kunne ha lyst til å dela med dei du kjenner. Det er fullt mogeleg å gå gjennom blogginnlegga tilbake i tid, eitt for eitt, for å sjå om du finn noko du vil dela med andre.

Som du vil sjå: Det er berre dei siste innlegga som er å sjå på framsida av bloggen – her du no les. Men i høgre spalte finn du ein kalender, der du kan klikka på dei ulike datoane for å få fram innlegg. Du kan også gå inn i Arkiv-delen i høgre spalte for å velja å sjå innlegga frå ein sæskild månad.

Når du leitar fram eit gamalt oppslag, vil du berre få sjå ein oversikt over tekstane utan bilete. Du lyt då dobbeltklikka på tittelen i innlegget for å få opp heile innlegget med både foto og tekst.

Har dei starta ei ny flodbølgje i Simadal?
(ka skjer)  I august 1937 var det storflaum i Simadal, og no spørs det om sykkelskyttarane i Eidfjord Cider og Sykleclub har starta ei ny «flodbølgje». For det kan sjå ut som at skarpskyttarane no har truffe blink på meir enn ein måte. Her blandast jo moro og uhøgtideligheit med sykling og skyting. Hygge og sport går hand i hand. Publikumsvenleg, spanande, nyskapande. Dermed kan det vera at president i laget, Irene Vivelid, og hennes medsamansvorne syklistar, verkeleg har lagt eit gullegg. Det er tydeleg at folk på andre plassar har stor sans for denne nye sporten og snart lyt ein kan henda oppretta «Landsorganisasjonen for sykkelskyting», kven veit? Sporten passar for folk i alle aldrar og kan óg vera ein inspirasjon til å få interesse for skyting eller sykling på eit toppnivå. Me oppfordrar folk til å dele dette innlegget med folk dei kjenner på heilt andre plassar i Norge. La budskapet om sykkelskyttarane frå Eidfjord gå over heile landet. Eit gullegg.

Foto: Christian Bouvain

Resultater frå Simadal laurdag 12. mai

Grendalaget i Øvre Eidfjord

(ka skjer)  Dette var eit flott “nyhende”. Laget kunne presentera seg i EidfjordNytt no i vår, men vart likevel stifta alt i fjor. Eit sus av fortida på eit vis, men samtidig eit fint tiltak som kan verta viktig for utviklinga og samhaldet i Øvre Eidfjord. Dei gode, gamle ungdomslaga har jo i stor grad måtta gi tapt for alt det nye og moderne i  bygdesamfunnet, og med det har ein mista mykje. Driftige eldsjeler heldt lenge Ungdomslaget i Eidfjord levande, men måtte kasta inn handkledet for nokre år sidan. Folk var for opptekne med eigne aktivitetar, og laget måtte leggjast ned. I Sverige har ein svært mange stader framleis sine “hembygdsföreninger”, som  har ein allsidig og spanande aktivitet. Eg misunner svenskane deira “hembygdsföreininger”, der ein har ein eigen hembygdsgard som folkeleg samlingsstad.

Men no er grendalaget i Øvre Eidfjord ein realitet, og me ynskjer all mogeleg lukke til med arbeidet, ungdomshuset og framtida.

Og på torsdag vert det triveleg 17. mai-frukost i regi av Grendalaget.

Engelske Charles William Rothery teikna Sæbø då han vitja bygda i 1845. Les meir om vitjinga i Øvre Eidfjord i boka”Ættegarden i Sysendalen” (side 19)

.

Årets sykkelskyttermeisterskap går av stabelen laurdag 12. mai kl. 13.00

(ka skjer?)  Eidfjord Cider & Sykle Club står bak dette noko uortodokse meisterskapet, om me kan tillata oss ei slik formulering. Og om du ikkje er heilt kjend med denne cidersykkelsporten, så er du no ikkje helt åleine om det. Men no har president Irene Vivelid gjort det tydleg kva klubben driv på med og oppmodar i siste EidfjordNytt einkvar som kan krypa og gå, om å ta turen inn til Simadal på laurdag (12. mai). Men kom ikkje tomhendt. Ein lyt nemleg finna fram dei norske flagga – dei skal jo uansett ut or skuffa og strykast om få dagar –, og så lyt ein ta med kaffi, pølser og truleg mykje godt humør.

Me veit jo alle kor spanande det er med skiskyting i fjernsynsboksen vintersdagen, og no har me altså fått vårt eige meisterskap. Men ciderkanna får me no tru at deltakarane lèt stå heime på garden denne dagen då medlemene skal treffa blink og sykla i sine åletronge, fargerike klede.

Me kan berre oppmoda stor og liten, gardbrukar og fiskar, tjukk og tunn, høgreveljarar og SV-arar, vegetarianarar og kebabelskarar – har eg fått med alle no? – til å setja seg på den rustne, gamle DBS-sykkelen og koma seg inn til Simadal laurdag 12. mai kl. 13.00.

Foto: Christian Bouvain

Sputnik med show på Samfunnshuset

(ka skjer?)  Så er det offisielt. Sjølvaste Sputnik kjem til bygda. Det var etter forslag frå godt vaksne bygdefolk at det heile er kome i stand, akkurat som det var då Jon Eikemo vitja bygda i fjor. Og Herreklubben tok utfordringa på strak arm og inviterte lastebilsjåføren Knut Storbukås til Eidfjord.  Visste du forresten at han har vore her tidlegare? Jau, på åttitalet heldt han show på det gamle Vøringfoss Hotell, og det var svært vellukka. Sputnik har halde det gåande i nærare 30 år, og er stadig svært etterspurd. Nokre har freista å hevda at Sputnik ikkje er finkulturell nok, men dei aller fleste er begeistra for hans folkelege songar og stil. For dette er verkeleg musikk til å verta glad av. Her kan ein nyta stemninga, syngja med eller svinga seg til taktane av “Nå skal vi skilles, Johanne”, eller dei andre slagarane.

Samfunnshuset, sundag 3. juni klokka 18.00

Informasjon om førehandssal av billettar kjem seinare. Følg med.